काठमाडौँ, ३ वैशाख : प्रधानमन्त्री पुष्पकमल दाहाल ‘प्रचण्ड’ले सडक पूर्वाधारको निर्माण तथा विस्तार गर्ने राष्ट्रिय लक्ष्य प्राप्तिमा सुरूङमार्ग निर्माणले ठूलो भूमिका खेल्ने बताउनुभएको छ।

नागढुङ्गा सुरूङमार्ग निर्माण आयोजनाको मुख्य सुरूङ ‘ब्रेक–थ्रु’ भएको अवसरमा आज आयोजित कार्यक्रमलाई सम्बोधन गर्दै प्रधानमन्त्री प्रचण्डले पूर्वाधारको क्षेत्रमा सुरुङमार्ग निर्माण महत्त्वपूर्ण उपलब्धि भएको बताउनुभयो। 

“सडक सञ्जालको माध्यमबाट अन्तरआबद्धता विस्तार गरी आवागमनमा सहजता, यातायात लागतमा न्यूनता, भौगोलिक तथा जनसाङ्ख्यिक सन्निकटता र प्रादेशिक सन्तुलन कायम गर्नेगरी सडक पूर्वाधारको निर्माण तथा विस्तार गर्ने राष्ट्रिय लक्ष्यमा यस्ता सुरूङमार्ग निर्माणले ठूलो भूमिका खेल्नेछ,” प्रधानमन्त्री प्रचण्डले भन्नुभयो ।

सुरूङ निर्माणपश्चात् सुरूङमार्गले उपत्यकाबाट बाहिरिने सडकको अवस्था सुधार गरी यात्राको समय र यातायात सञ्चालन खर्च घटाउने विश्वास व्यक्त प्रधानमन्त्री प्रचण्डले ट्राफिक र सडक सुरक्षामा सुधार गरी सङ्घीय राजधानी काठमाडौँ र देशका अन्य प्रमुख शहरहरूबीचको सहज यातायात सञ्जालमा योगदान पुर्‍याउने बताउनुभयो। 

“यस सुरूङमार्गलाई आधार मान्दै नेपाली माटो सुहाउँदो सुरूङ सम्बन्धि दस्तावेज निर्माण हुनेछ,” प्रधानमन्त्री प्रचण्डले भन्नुभयो, “यसले नेपाललाई सुरूङ युगमा पुर्‍याउन महत्त्वपूर्ण योगदान गर्नेछ ।” उहाँले आगामी योजनामा राष्ट्रिय राजमार्गहरूमा सुरूङमार्ग, फ्लाइओभर तथा अन्डरपाससहितको आधुनिक सडक सञ्जाल विस्तार तथा निर्माण गर्ने सरकारको नीति रहने बताउनुभयो ।

नयाँ वर्षको सुरूआतसँगै नेपालकै पहिलो सुरूङमार्गको मुख्य सुरूङको ‘ब्रेक–थ्रु’ गर्ने ऐतिहासिक अवसर प्राप्त भएकोप्रति खुशी व्यक्त गर्दै प्रधानमन्त्री प्रचण्डले पृथ्वी राजमार्गअन्तर्गत नागढुङ्गा क्षेत्रमा हुने गरेको ट्राफिक जाम, उकालो सडक, सडक सुरक्षाका हिसाबले कायम रहेको जोखिम साथै वर्षायाममा हुने पहिरोको उच्च जोखिम लगायतका समस्याहरू समाधान गर्न सुरुङमार्गको कल्पना गरिएको बताउनुभयो ।

नागढुंगा सुरूङमार्ग निर्माण आयोजनाको मुख्य सुरूङ ‘ब्रेक–थ्रु’ समारोहमा सम्माननीय प्रधानमन्त्री पुष्पकमल दाहाल ‘प्रचण्ड’ज्यूले गर्नुभएको सम्वोधन
(२०८१ वैशाख ३ गते, धादिङ्ग)

    
कार्यक्रमका अध्यक्षज्यू,
उपप्रधानमन्त्री तथा भौतिक पूर्वाधार तथा यातायात मन्त्रीज्यू,
मित्र राष्ट्र जापानका राजदुतज्यू(Your excellency, ambassador of Japan, Mr. Kikuta Yutaka)
बिभिन्न राजनीतिक दलका प्रतिनिधिहरू,
राष्ट्रसेवक कर्मचारीहरू,
सुरूङ्गमार्गमा संलग्न निर्माण व्यवसायी तथा परामर्शदाताहरू,
सञ्चारकर्मी मित्रहरू,
उपस्थित सम्पूर्ण महानुभावहरू ।
सर्वप्रथम नयाँ वर्ष २०८१ सालको सुखद् उपलक्ष्यमा स्वदेश तथा विदेशमा रहनुभएका समस्त नेपालीहरूमा हार्दिक शुभकामना व्यक्त गर्दछु । नयाँ वर्षको सुरूवातसँगै नेपालकै पहिलो सुरूङमार्गको मुख्य सुरूङको ‘ब्रेक–थ्रु’ गर्ने ऐतिहासिक अवसर पाउँदा मलाई अत्यन्त खुशी लागेको छ । 

पृथ्वी राजमार्गअन्तर्गत नागढुङ्गा क्षेत्रमा हुने गरेको ट्राफिक जाम, उकालो सडक, सडक सुरक्षाका हिसाबले कायम रहेको जोखिम साथै वर्षायाममा हुने पहिरोको उच्च जोखिम लगायतका समस्याहरू समाधान गर्नका लागि यो आयोजना परिकल्पना गरिएको थियो । 

फलस्वरूप, सुरूङ निर्माणपश्चात् सुरूङमार्गले उपत्यकाबाट बाहिरिने सडकको अवस्था सुधार गरी यात्राको समय र यातायात सञ्चालन खर्च घटाउने छ । साथै ट्राफिक र सडक सुरक्षामा सुधार गरी सङ्घीय राजधानी काठमाडौं र देशका अन्य प्रमुख शहरहरूबीचको सहज यातायात सञ्जालमा योगदान पु¥याउनेछ । यस सुरूङमार्गलाई आधार मान्दै नेपाली माटो सुहाउँदो सुरूङ सम्बन्धि दस्तावेज निर्माण हुनेछ। यसले नेपाललाई सुरूङ युगमा पु¥याउन महत्वपूर्ण योगदान गर्नेछ । आगामी योजनामा राष्ट्रिय राजमार्गहरूमा सुरूङमार्ग, फ्लाइओभर तथा अन्डरपाससहितको आधुनिक सडक सञ्जाल विस्तार तथा निर्माण गर्ने सरकारको नीति रहनेछ।  
सडक सञ्जालको माध्यमबाट अन्तरआबद्धता विस्तार गरी आवागमनमा सहजता, यातायात लागतमा न्यूनता, भौगोलिक तथा जनसांख्यिक सन्निकटता र प्रादेशिक सन्तुलन कायम गर्ने गरी सडक पूर्वाधारको निर्माण तथा विस्तार गर्ने राष्ट्रिय लक्ष्यमा यस्ता सुरूङमार्ग निर्माणले ठूलो भूमिका खेल्नेछ।

पूर्वाधार विकासको कुरा गर्दा हामीले राष्ट्रिय गौरवका आयोजना र राष्ट्रिय प्राथमिकता प्राप्त आयोजनाहरूको निर्माण कार्य समयमै सम्पन्न गर्नका लागि अहोरात्र मिहेनत गरिरहेका छौँ । मैले प्रत्यक्ष रूपमा आयोजनाको समस्या समाधान र सहजीकरणका लागि प्रधानमन्त्री तथा मन्त्रिपरिषद्को कार्यालयबाट आयोजनाहरुको भर्चुअल मनिटरिङ्ग गर्दै आएको छु । खुसीको कुरा, सुनकोशी मरिन डाइभर्सन सिंचाइ आयोजनाको पनि सुरूङ छिटै ‘ब्रेक–थ्रु’ हुँदैछ । यसका साथै निर्माणाधीन कोशी, कर्णाली करिडोरहरूले पहाडी क्षेत्रलाई तथा काठमाडौं तराइ–मधेश फास्ट ट्रयाकले पहाड मधेशलाई सडक सञ्जालमा जोड्ने मात्र नभएर वस्तु तथा सेवाको लागत घटाउनेछ । यी परियोजनाहरूले नेपालको आर्थिक क्षेत्रमा गुणात्मक योगदान गर्नेछ।

नेपालले पूर्वाधार विकाससँगै औद्योगिक विकासको क्षेत्रमा सँगसँगै अगाडि बढाउनुपर्ने जिम्मेवारी हाम्रोसामु छ । वस्तुको आपूर्ति तथा वितरणमा हुने लागत, इन्धन, समय आदिको लजिस्टिक खर्च घटाउँदै उद्योगहरूको प्रतिस्पर्धी क्षमता बढाउने लजिस्टिक पूर्वाधार आजको आवश्यकता हो । काठमाडौंबाट नारायणगढ, भैरहवा, वीरगञ्ज, पोखरा विराटनगरलगायतका ठाउँसम्म कम समय र थोरै लागतमा ढुवानी हुनसक्ने द्रूतमार्ग ९ँबकत त्चबअप०हरू बनाउनु पर्दछ । चीन, भारत, भियतनाम, थाइल्यान्डजस्ता उदीयमान अर्थतन्त्र भएका देशहरूले पनि पछिल्ला वर्षहरूमा पूर्वाधार विकासलाई प्राथमिकता दिइरहेका छन् । हामीले पूर्वाधार विकासमा फड्को मार्न यस्तै बृहत् र फराकिलो तथा एकीकृत सोचसहितको राष्ट्रिय पूर्वाधार गुरूयोजना निर्माणलाई प्राथमिकता दिनैपर्दछ । आगामी आर्थिक वर्षको नीति तथा कार्यक्रम र बजेटले निजी क्षेत्रलाई उत्साहित बनाउने र नेपालमा ठूला पूर्वाधार विकासमा लगानी आकर्षित गर्ने मेरो विश्वास छ।

विश्वव्यापीकरणको उच्चतम लाभ लिँदै नेपालले आधुनिक पूर्वाधार विकासका लागि चाहिने आवश्यक पुँजी र प्रविधिलाई विशेष जोड दिन आवश्यक छ । यस कार्यका लागि नीतिगत सुधार र विश्व बजारसँग वित्तीय उपकरणलाई जोड्न पहल गर्नुपर्नेछ। 

यही वैशाख १६ र १७ गते अन्तर्राष्ट्रिय लगानी सम्मेलनको आयोजना पनि सम्पन्न गर्ने तयारी भइरहेको छ । यसले नेपालको विकासमा लगानीका सम्भावनालाई अन्तर्राष्ट्रिय मञ्चमा जोड्ने प्रयास गर्नेछ । यसका लागि आवश्यक नीतिगत सुधारका कामहरू भइरहेका छन् । नेपालको आर्थिक विकासका लागि वैदेशिक लगानीलाई प्रोत्साहन र आकर्षित गर्न आवश्यक रणनीतिका साथ अघि बढ्ने सरकारको तयारी छ ।

सरकारको नयाँ समीकरणपछि राजस्व संकलनले सुधारको लय समातेको छ । चालु आर्थिक वर्षको चैत मसान्तसम्म ३ खर्ब ६७ अर्ब रूपैयाँ आन्तरिक राजस्व संकलन भएको छ । आयातित इन्धन घटाउँदै विद्युतीय गाडीमा प्रोत्साहन, सिमेन्ट निर्यातमा भएको महत्वपूर्ण प्रगति, जस्तपाता र स्टिलको निर्यातमा बढोत्तरी, पर्यटक आगमनमा इतिहासकै नयाँ रेकर्ड, उपत्यकाबाहिर हाउजिङ र अपार्टमेन्ट व्यवसायको बिस्तार, भारत लगायत तेस्रो मुलुकमा विद्युत निर्यातको समझदारी र तयारी, सडक पूर्वाधारमा सुरूङमार्गको नयाँ युगमा प्रवेश, रेमिट्यान्समा वृद्धिका कारण बाह्य व्यापारमा सहजता, सूचना–प्रविधिमा अर्बौंको आइटी सेवा निर्यात, स्टार्टअप बिजनेशमा प्रगति लगायतका आर्थिक परिसूचकहरूले हामीलाई विकास र समृद्धिको नयाँ युगमा प्रवेशका निम्ति महत्वपूर्ण उर्जा दिएका छन् । तसर्थ, ‘‘केही हुँदैन’’ भन्ने निरासाजनक भाष्य चिर्दै सुशासन, सामाजिक न्याय र समृद्धिको नयाँ मार्गमा ऐक्यवद्धता जाहेर गर्दै राष्ट्रिय उत्साह सिर्जना गर्न म सम्पूर्ण जनसमुदायमा हार्दिक अपील गर्दछु।

आजको दिनबाट नेपाल पूर्वाधार विकासको नयाँ गन्तव्यमा प्रवेश गरेको छ । यस महत्वपूर्ण अवसरमा सुरूङमार्ग निर्माणमा सहयोग गर्दै आएको मित्रराष्ट्र जापान सरकारलाई हृदयदेखि नै धन्यवाद व्यक्त गर्दछु । यसले नेपाल र जापान सरकारबीच मात्र नभएर जनस्तरमा रहँदै आएको घनिभूत सम्बन्धलाई थप सुदृढ गरेको मैले महशुस गरेको छु। 

अन्त्यमा, नागढुङ्गा सुरूङमार्ग निर्माण कार्य सफल पार्न महत्वपूर्ण भूमिका खेल्ने नेपाल सरकार, परामर्शदाता, निर्माण कम्पनि, कर्मचारीहरू, मजदुर साथीहरू लगायत सम्पूर्ण जनसमुदायमा हार्दिक आभार प्रकट गर्दछु । तपाईहरूको समर्पण, लगनशीलता र जिम्मेवारीप्रतिको अटल प्रतिवद्धताबाट प्राप्त सफलताका निम्ति हृदयदेखि सम्मान व्यक्त गर्दछु । धन्यवाद ।