काठमाडौं। नेपाल कम्युनिष्ट पार्टी (माओवादी केन्द्र)का अध्यक्ष तथा पूर्व प्रधानमन्त्री पुष्पमकल दाहाल ‘प्रचण्ड’ ले सुख्खायामसँगै देशका विभिन्न भागहरुमा हुने गरेका आगलागी र डढेलो नियन्त्रणका लागि तात्कालिन र दीर्घकालिन योजना बनाउन सरकारलाई आग्रह गर्नुभएको छ ।
अध्यक्ष प्रचण्डले बाँके जिल्लाको नरैनापुर गाउँपालिका वडा न–४ खोदवामा शनिवार भीषण आगलागीबाट भएको क्षतिप्रति दुःख व्यक्त गर्दै यस्तो बताउनुभएको हो ।

उहाँले आइतवार एक विज्ञप्ति जारी गर्दै भन्नुभएको छ, ‘सुख्खायामसँगै नैरनापुर जस्ता देशका विभिन्न भागहरुमा आगलागी र डढेलो लाग्ने गरेको छ । आगलागी र डढेलो नियन्त्रणका लागि तात्कालिन र दीर्घकालिन योजना सहित आवश्यक कदम चाल्न तीनवटै तहका (स्थानीय, प्रदेश र केन्द्र) सरकार सहित सम्बन्धित सबैमा आग्रह गर्दछु ।’

उहाँले विज्ञप्तिमा नैरनापुरका बासिन्दाको मुख्य समस्या गरीबी र विपन्नता भएको भन्दै घनाबस्ती र फुसका छाना भएका असुरक्षित आवासका कारण बस्तीहरु बर्सेनी आगलागीको चपेटामा पर्ने गरेको बताउनुभएको छ । उहाँले ती बस्तीलाई सुरक्षित गर्ने दीर्घकालिन समाधानका लागि राज्यको विशेष ध्यान जान जरुरी भएको पनि बताउनुभयो ।

अध्यक्ष प्रचण्डद्वारा जारी विज्ञप्तिको पूर्णपाठः–

प्रेस विज्ञप्ति
बाँके जिल्लाको नरैनापुर गाउँपालिका वडा नं. ४, खोदवामा शनिवार भीषण आगलागीबाट भएको क्षतिप्रति दुःख व्यक्त गर्दछु । देशकै पिछडिएको गाउँपालिकाका रुपमा सूचीकृत नरैनापुर गाउँपालिका–४ खोदवामा मात्रै ११५ घरधुरी जलेर नष्ट भएका छन् । यो संख्या प्रारम्भिक अनुमान भएकाले अझै बढ्ने सम्भावना छ । उक्त आगलागीबाट घाइते भएकाहरुको शीघ्र स्वास्थ्य लाभको कामना गर्दछु ।

यस गाउँपालिकाका विभिन्न वडाहरुमा विगत एक महिनामा ठूलठूला आगलागीका घटनाहरु भएका छन् । नैरनापुरका बासिन्दाको मुख्य समस्या गरीबी र विपन्नता हो । घनाबस्ती र फुसका छाना भएका असुरक्षित आवासका कारण यहाँका बस्तीहरु बर्सेनी आगलागीको चपेटामा पर्ने गरेका छन् । यी बस्तीलाई सुरक्षित गर्ने दीर्घकालिन समाधानका लागि राज्यको विशेष ध्यान जान जरुरी छ ।
आगलागीबाट पीडितहरुको तत्काल उद्दार, राहत र पुनर्वास तथा घाइतेहरुको निःशुल्क स्वास्थ्योपचारको लागि म सरकारसँग विशेष आग्रह गर्दछु ।

साथै सुख्खायामसँगै नैरनापुर जस्ता देशका विभिन्न भागहरुमा आगलागी र डढेलो लाग्ने गरेको छ । आगलागी र डढेलो नियन्त्रणका लागि तात्कालिन र दीर्घकालिन योजना सहित आवश्यक कदम चाल्न तीनवटै तहका (स्थानीय, प्रदेश र केन्द्र) सरकार सहित सम्बन्धित सबैमा आग्रह गर्दछु ।

२२ चैत्र, २०७७
……………………………
पुष्पकमल दाहाल ‘प्रचण्ड’
अध्यक्ष