असोज १५, काठमाडौं । प्रधानमन्त्री पुष्पकमल दाहाल ‘प्रचण्ड’ शनिबार एकैदिन प्य’ठान, बाँके, कैलाली र बर्दियाको कार्यक्रममा सहभागी भएर काठमाडौं फर्कनुभएको छ ।
नेपाल एयरलाइन्सको हेलिकोप्टरबाट बिहान ११ बजे प्युठान पुग्नुभएका प्रधानमन्त्रीले असार र श्रावण महिनामा गएको प्युठान जिल्लाको लुङ गाबिस, ६ बहानेमा गएको पहिरोको स्थलगत निरीक्षण गर्नुभयो ।
स्थानीय पीडितसँगको भेटघाटपछि आयोजित कार्यक्रममा बोल्दै प्रधानमन्त्रीले भन्नुभयो, ‘तपाईहरुको पीडामा साथ दिन म प्युठान आएको छु । मैले सरकारको नेतृत्व गरेदेखि नै बाढी पहिरो पीडितलाई भूकम्प पीडित सरह राहत दिने निर्णय गरिएको छ । अनुदान, राहत र सहुलियत ऋण पनि भूकम्प पीडित बराबर बनाउने निर्णय गरिएको छ, यसको छिटो कार्यान्वयन हुनेछ । लुङको पहिरो नियन्त्रण, राहत र पूनर्बासका लागि सरकारले गम्भीर रुपमा काम गर्नेछ ।’ प्रधानमन्त्रीले सरकार जनताको पक्षमा काम गर्न आतुर रहेको जानकारी दिँदै पीडितले सरकारको अनुभूति गर्ने गरी काम गर्ने विश्वास दिलाउनुभयो ।
त्यसलगत्तै शनिबार बाँकेको नेपालगञ्जमा निर्माणाधीन सिक्टा सिंचाई आयोजनाको प्रधानमन्त्रीले निरीक्षण गर्नुभयो । निरीक्षणका क्रममा प्रधानमन्त्रीले भन्नुभयो, ‘सिक्टा नेपालको आफ्नै लगानी, प्राविधिक र प्रशासनिक स्वामित्वमा सञ्चालित आयोजना हो । ४७ प्रतिशत काम भएको छ । समयभन्दा अगाडि काम सम्पन्न गर्नुहोला । सरकार छिटो र गुणस्तरीय काम गर्ने कर्मचारीहरुलाई पुरस्कृत गर्नेछ । नराम्रोका लागि होइन, राम्रोका लागि प्रतिस्पर्धा गरौं ।’
सिक्टा सिंचाई आयोजनाको निरीक्षणपछि प्रधानमन्त्रीले कैलालीको रानी जमरा कुलरिया सिंचाई आयोजनाको स्थलगत निरीक्षण गर्नुभयो । निरीक्षणका क्रममा प्रधानमन्त्रीले भन्नुभयो, ‘समयमै काम सम्पन्न हुनुपर्दछ । हामीले तोकिएको समयभन्दा छिटो आयोजना सम्पन्न गर्ने संस्कार र सोंचको विकास गर्न जरुरी छ । समयभन्दा छिटो आयोजना सम्पन्न गर्ने आयोजना र कर्मचारीलाई सरकारले पुरस्कृत गर्नेछ ।
निरीक्षणका क्रममा प्रधानमन्त्रीले सरकारी कार्यालयका प्रमूखहरुलाई निर्देशित दिँदै भन्नुभयो, ‘राजनीतिले छलाङ हान्यो, प्रशासनले त्यसलाई पछ्याउन सक्नुपर्छ ।
रानी जमरा कुलरिया सिंचाई आयोजनाको निरीक्षणपछि प्रधानमन्त्री माओवादी नेता तथा पूर्वमन्त्री रामचरण चौधरीको स्मृति सभा कार्यक्रममा सरिक हुनुभयो । शनिबार बर्दियाको खोल्टीबजारमा माओवादी केन्द्रका नेता तथा पूर्वमन्त्री रामचरण थारुको स्मृति कार्यक्रममा बोल्दै प्रधानमन्त्री तथा माओवादी केन्द्रका अध्यक्ष प्रचण्डले भन्नुभयो, ‘रामचरण उत्पीडित वर्गको आदर्श नेता हुनुहुन्थ्यो । उहाँ एक इमान्दार र कर्तव्यनिष्ठ नेता हुनुहुन्थ्यो । रामचरणलाई सम्झँदा पञ्चायतकालदेखि उहाँले गरेको त्याग र समर्पणको स्मरण भइरहेको छ । २०४६ सालको जनआन्दोलनभन्दा पहिलादेखि नै यस क्षेत्रको संगठन र संघर्षमा रामचरणले उच्च योगदान गर्नुभएको थियो ।’
प्युठानदेखि बाँके, कैलाली र बर्दियासम्मका चार महत्वपूर्ण औपचारिक र दर्जनौं अनौपचारिक कार्यक्रम र भेटघाटपछि शनिबार साँझ नै प्रधानमन्त्री काठमाडौं फर्कनुभएको छ ।