‘आधारभूत स्वास्थ्य र शिक्षा नागरिकको सम्पूर्ण जिम्मेवारी राज्यले लिनुपर्छ’
चितवन । नेपाल कम्युनिष्ट पार्टी (माओवादी केन्द्र) का अध्यक्ष एवं चितवन निर्वाचन क्षेत्रका प्रतिनिधिसभा सदस्य पुष्पकमल दाहाल ‘प्रचण्ड’ आधारभूत स्वास्थ्य र शिक्षा सेवा नागरिकको नैसर्गिक अधिकार भएकोले यसको सम्पूर्ण जिम्मेवारी राज्यले लिनुपर्ने बताउनुभएको छ । उहाँले यसो गर्दा मात्र राज्य व्यवस्था समाजवाद उन्मुख हुने उल्लेख गर्नुभयो । पूर्व प्रधानमन्त्री समेत रहनुभएका अध्यक्ष प्रचण्डले अखिल नेपाल प्रगतिशील जनस्वास्थ्यकर्मी महासंघ चितवनले आयोजना गरेको ‘चितवनको स्वास्थ्य सरोकारमा क प्रचन्ड’ बिषयक अन्तर्क्रियालाई सम्बोधन गर्दै यस्तो बताउनुभएको हो ।

अध्यक्ष प्रचण्डले स्वास्थ्य र शिक्षा क्षेत्रलाई नागरिकको सहज पहुँचमा ल्याउन सघन छलफल भईरहेको भन्नुहुँदै यस बिषयमा छिट्टै नतिजा निस्कने समेत बताउनुभयो । भरतपुर मेडिकल सिटिको रूपमा बिकसित हुँदै र यस क्षेत्रलाई अझै व्यवस्थित बनाउन सरोकारवाला एकजुट हुनुपर्नेमा उहाँको जोड थियो ।

भरतपुर अस्पताललाई केन्द्रीय अस्पतालमा स्तरोन्नती गरिएको जानकारी दिँदै उहाँले सोहि बमोजिम यस अस्पतालको भौतिक पूर्वाधार विकास र विस्तारमा ध्यान दिने बताउनुभयो । उहाँले विपी कोइराला मेमोरियल क्यान्सर अस्पताललाई प्रतिष्ठानको रूपमा बिकास गर्ने बिषय छलफलमै रहेको र छिट्टै टुंगिने विश्वास समेत व्यक्त गर्नुभयो ।

अध्यक्षले भन्नुभयो, ‘मैले निजी स्वास्थ्य संस्थाहरूका समस्याहरू पनि सुने, विद्यार्थी भाइबहिनीहरुका समस्या पनि सुने, स्वास्थ्यकर्मी र सरकारी स्वास्थ्य केन्द्रहरूको समस्या पनि सुने, यी सबै समस्याहरू जायज छन् । म यो समस्या सरकारका मन्त्रिहरूसंग सामुहिक रूपमा छलफल गरी परिणाम आउने काम अगाडि बढाउँछु ।’ उहाँले काठमाडौं पुग्ने बित्तिकै छलफल गरी यस विषयमा अगाडि बढाउने विश्वास समेत दिलाउनुभयो।