क. प्रचण्ड
काठमाडौं, २७ जेठ । अमेरिकाका मध्य एसिया मामिला हेर्ने प्रमुख डिपुटी सहायक मन्त्री विलियम ई. टोडले आज बिहान अध्यक्ष प्रचण्डसँग लाजिम्पाटमा भेट गर्नुभएको छ । भेटमा अमेरिकी राजदूत एलिना बि टेप्लिज र दक्षिण तथा मध्य एसिया मामिलाका डाइरेक्टर क्लिन्टन एस. ब्राउनको पनि उपस्थिति रहेको थियो ।
भेटका क्रममा अध्यक्ष कमरेड प्रचण्डले उहाँलाई स्वागत गर्नुभयो । सहायक मन्त्री टोडले संविधान कार्यान्वयन, मधेस आन्दोलन, शान्ति प्रक्रिया र नेपालको आर्थिक विकास बारे जिज्ञासा राख्नुभएको थियो ।
अध्यक्ष कमरेड प्रचण्डले संविधान कार्यान्वयन, शान्ति प्रक्रियाका बाँकी काम पुरा गर्न, पुनर्निर्माणलाई तीब्रताका साथ सम्पन्न गर्न र देशको आर्थिक विकास गर्न राष्ट्रिय एकताको आवश्यकता रहेको बताउनु भयो । उहाँले भन्नुभयो, ‘राष्ट्रिय एकता र राष्ट्रिय सहमतिको सरकार निर्माणमा हाम्रो पार्टीको तर्फबाट मैले यसैमा केन्द्रित रहेर भरमजदुर प्रयास गरिरहेको छु ।’
‘हामी हाम्रा अन्तर्राष्ट्रिय मित्रहरुबाट विगतदेखि सहयोग प्राप्त गरिरहेका छौं, आउने दिनमा पनि सहयोगको अपेक्षा राख्दछौं’, भन्नुभयो । यस क्रममा टोडले नेपाल अमेरिकाको असल मित्र भएको बताउँदै भन्नुभयो,‘ हामी हाम्रो मित्र देशको प्रगतिको आशा राख्दछौं ।’
