क. प्रचण्ड
काठमाडौंः नेपाल कम्युनिस्ट पार्टी (नेकपा)का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले आँखा अगाडि परिवर्तनमाथि यत्ति ठूलो प्रहार भएकाे भन्दै नेता–कार्यकर्तालाई लोकतन्त्रका पक्षमा उभिन निर्देशन दिनुभएकाे छ ।
नेपाल कम्युनिस्ट पार्टी (नेकपा)काठमाडौ जिल्ला कमिटीद्वारा आयोजितबृहद कार्यकर्ता भेलालाई सम्बाेधन गर्दै अध्यक्षले आफूहरू उखानटुक्काले हसाएर कमेडी सो देखाउन जुटेकाे नभइ स्थापित परिवर्तनमा मुद्दा एम्बुसमा परेपछि एकजुट भएकाे बताउनुभयाे ।
‘केपी ओलीले राजनीतिक जोकरपन देखाउनुभयो । जोकरका पछाडि कोही पनि लाग्दैनन् । साथीहरू त पोलिटिकल जोकरजस्तो लाग्छ,’ उहाँले भन्नुभयाे ।
अध्यक्ष प्रचण्डले पार्टीले काम गर्न नदिएको भन्ने प्रधानमन्त्रीकाे आराेपप्रति एउटा प्रमाण दिन प्रम ओलीलाई चुनौती दिनुभयाे । प्रतिनिधिसभा भंग गर्दा प्रधानमन्त्री ओलीले पार्टीले घेराबन्दी ग-यो, काम गर्न दिएन भनेर दाबी गरेको भन्दै उहाँले भन्नुभयाे, ‘केपी ओलीजीलाई मेरो चुनौती छ, पार्टीले काम गर्न नदिएको एउटा प्रमाण दिनुस् । कुन काममा भाँजो हाल्यो ?’
उहाँले ओलीले संविधान र संघीय लोकतान्त्रिक गणतन्त्रको मुटुमा छुरा हानेको बताउनुभयाे । अध्यक्ष प्रचण्डले जबज छोड्ने पहिलो व्यक्ति ओली भएको बताउँदै भन्नुभयाे, ‘अहिले भ्रम छर्न खोजेका छन्, तर जबज छोड्ने पहिलो व्यक्ति केपी ओली हो, जबज छोड्ने पहिलो व्यक्ति केपी ओली हो । केपी ओली नै हो ।’
उहाँले अदालत र निर्वाचन कसैको सेटिङमा नचल्ने बताउनुभयाे । उहाँले अगाडि भन्नुभयाे, ‘केपी ओलीले अदालत र निर्वाचनसँग सेटिङ मिलाइसकेका छन् भन्ने आम जनतामा आशंका छ । त्यो हुनै सक्दैन । म सेटिङ भन्ने शब्द नै सुन्न चाहँदैन ।’ ओलीले हजारौं शहीदको अपमान गरेको भन्दै त्यसकाे साक्षी आफू बस्न नसक्ने बताउनुभयाे ।
